An der Grenze

An der Grenz’ in Klingenbach,
war a Wirbel, und zwar net schwach.
A Zöllner, der Huaber Nazl, aus Kukmirn,
tuat an Lastler kontrollier’n.
Er fragt den Fahrer, a Bulgare,
was hast denn g’lad’n, welche Ware?
JEM, sagt der darauf, ganz gelass’n,
und laßt den Rauch’n durch de Nas’n.
Der Nazl, tuat eam net versteh’n
Und sagt, den Frachtbriaf, bitte, will i seh’n!
Der Fahrer greift ins Fachl vire,
gibt dem Nazl de Papiere,
da zuckt der Nazl auf einmal ’zamm,
du sagst JEM, … aber da steht JAM!
Wennst schmuggeln willst, i komm dir drauf,
jetzt mach einmal de Bordwand auf!
Nau der Nazl schwingt sich aufe, aufs Plateau,
montiert von ana Kist’n den Deck’l o,
drinnen san Bechan, große, kleine,
er macht an auf und steckt den Finger eine.
Dann kost’ er, du, des schmeckt net fad,
aber hörst, dös is ja a Mamalad!
Das darfst ja wirklich keinen erzöhl’n,
i glaub gar, du willst mi schöl’n!
Unter de Umständ’, muaßt am Zollamt bleib’n,
kumm her und tua ma unterschreib’n.
Der Bulgare, konnt’ net schreib’n und net les’n,
er is a Analphabet gewesen,
macht drei Kreuz’ln hin, mit’n Blei,
da war’s mit’n Huaber Naz vorbei.
Er is eineg’stürzt zum Boß,
hat g’sagt, du Chef, da draußen is der Teufel los!
Sichst eam steh’n dort, der Bulgare,
wia i frag’, was hast für Ware?
Sagt der JEM, aber im Briaf steht JAM
Und wia ma nacher kost’n tan
Nau nachher war’s a Mamalad,
hörst Chef, i war ganz desparat!
Zu guater Letzt, was mi am meisten gift’,
…fälscht dös Gfrast dei’ Unterschrift!

Aus:“Die Heider-Familie und andere G’schichten“ von H.P.Ö. – Heider Poldi Österreich Rubato-Verlag Wien (Vortrag mit Quellenangabe gestattet). Zur Vefügung gestellt von Heinz Hirsch.

 zurück